Den norske bokbyen sel bruktbøker heile året, på nettet og i 12 bokutsal i Fjærland. Nokre av bokutsala er kombinerte med kafé, husflidsutsal og kunstgalleri. Gjennom sumarsesongen er det fleire tilstellingar i bokbyen, til dømes Opningshelgi fyrst i mai, og Boknatti, rundt jonsok kvart år.

Bokbyen i Mundal i Fjærland vart grunnlagd i 1995, og har no om lag 4 hyllekilometer bøker til sals i eit titals utsal av ymse storleikar og opphav: ferjeventerom, fjøs, bank, fryseri og postlokale. At Bokbyen baserer seg på gjenbruk også når det gjeld utnytting av ledige lokale, gjer at bokutsala blir svært originale i utforming.

Her er to store butikkar: Den norske bokbyen AS (som har fleire utsal), Straumsvågs Antikvariat, og fleire mindre som spesialiserer seg på ymse litteraturområde.

Den norske bokbyen er open frå mai til september. Både Straumsvågs Antikvariat og Den norske bokbyen AS har kontorverksemd heile vinteren, og byggjer då opp til neste sesong. Gjennom vinteren er her livleg postordresal.